Nghaamwa a Gandwa Ko-Rdp

Photograph by Oswald Shivute

PETHIMBO ta ningi oshipopiwa she shetaambeko lyaanashigongi koshigongi shokomisi yomahogololo yaNamibia pOnhuno moshitopolwa shaHangwena mEtitatu lyoshiwike sha zi ko, gavena yaHangwena tate Usko Nghaamwa, okwa yiwa moshipala nokugandwa kaawiliki yaali yoRally for Democracy and Progress (RDP), taya ti kutya ota longitha iigongi yokomisi ndjika moku uvitha opolotika ye yongundu yoSwapo.

Shika osha ningwa sho pethimbo ta gandja oshipopiwa she shetaambo lyaayehe koshigongi shika, gavena Nghaamwa, u uka po gumwe gwomaanambelewa yokomisi yomahogololo Pohamba Hamutenya, tati okwa ya momikunda, ano kooyene yomikunda dhomoshikandjohogololo shaHangwena a ka gandje omauyelele gomainyolitho gomahogololo, inaa pitila kombelewa ye nenge kombelewa yakaansela moshikandjohogololo shoka shaHangwena, shoka pethimbo ndika shi li metonatelo lyakaansela gwaShikango tate Phillip Namundjembo, omolweso lyakaansela gwasho mee Maria Kombwana, ngoka a thigi po uuyuni mbuka meti 5 Mai 2014. Gavena Nghaamwa tati, oku uva kutya Hamutenya sho a yi momikunda moka ina pita kombelewa yakaansela, ooyene yomikunda naakalimo momikunda moka, inaye mu itaala ko, oshoka ka li a pita kombelewa yakaansela. MUumbangalantu waNamibia, omu na omukalo ngoka kutya ngele aanambelewa yomauministeli gi ili nogi ili, otaya ka longa sha momikunda moka, oye na okupitila tango kombelewa yagavena nenge yakaansela gwoshikandjohogololo moka mu na omikunda moka ta ka longela. Ndele hakuya ashike kumwene gwomukunda ngoka. Taku tiwa ngele ino pita koombelewa dhaawiliki mboka, nena owa talika wa pitila anuwa kokantu. Mboka yo-RDP oya tala nee kutya gavena nookaansela dhe oye li aakwaSwapo noya hala okwi iningila omahwahwameko gawo gopapolotika, taya pitile miigongi yepangelo. Oshinima ishewe shimwe sha popiwa kugavena Nghaamwa shu uvitha nayi aawiliki mbaka yo-RDP, osho a ti anuwa kutya iilyo naayambidhidhi dhoongundu dhi ili nodhi ili dhopapolotika moshikandjohogololo shaHangwena naya ka ninge omahogololo gawo mombepo yombili, ihe nee inaya nwina pamwe. Shoka kutya inaya nwina pamwe, osho shu uvitha nayi aawiliki o-RDP poshigongi mpoka noya yi nee gavena Nghaamwa moohapu noku mu ganda manga ta popi. Shimwe sha popiwa wo kugavena Nghaamwa, shu uvitha nayi aakwa-RDP osho a ti kutya, oshigwana nashi kotokele aasita yiifundja. A ti kutya omuntu ino mona ashike omuntu te ende mpoka, a zala nawa oonguyo dhuusita, ngoye oto yi kuye e ke ku shashe. A ti, to ka shashwa nena nokwi itaalithwa komuntu a puka. Omapopyo agehe ngaka, aawiliki yo-RDP ya li moka, oye wete kutya iinima yopolotika, na kayu uvite kutya oshi li pauyuuki gavena Nghaamwa a longithe oshigongi shokomisi yomahogololo moku uvitha nokuhwahwameka opolotika ye yoSwapo moka.

quotOmusimanekwa gavena Nghaamwa, tse inatu hala nande oku uva ehwahwameko lyopolotika yoye yoSwapo. Tse otwe ya komayelithilo gomahogololo kokomisi yomahogololo, inatu ya kopolotika nandenande. Ongoye lye sho wa hala oku tu longa nowa hala okutukutha mwaashoka twe endela shokulongwa kokomisi nkene tu na oku ka hogolola. Iinima ayihe mbyoka to popi, otayi kongo shike moshigongi shokomisi yomahogololo yepangelo? Gumwe gwomaawiliki yo-RDP tate Dineinge Sheya a ti ngawo nokuganda gavena Ngaamwa i igameke koshipopiwa she shetaambo lyaanashigongi. Sheya okwa lombwele wo Nghaamwa kutya ye mopolotika opo e ya mo, ine ya fa yo mbaka ya kala pondje mekondjelomanguluko lyaNamibia. quotTse omo twa kokela moSwapo kwali tatu kondjele emanguluko lyaNamibia, inatu ku fa ngoye ngu opo wa yi mo moSwapo,quot Sheya a ti ngawo noshipala sha lula. Tati kutya gavena Nghaamwa anuwa enyuwa mopolotika. Omuhogololwa gwo-RDP momahogololo ngoka tage ya moshikandjohogololo shaHangwena Vilho Shimooshili naye okwa yi mo mundhoka Sheya megando lyagavena Nghaamwa. Ta pula kaanambelewa yokomisi yomahogololo kutya omolwashike taye etha gavena Nghaamwa u uvithe opolotika ye yoSwapo moshigongi shepangelo, ano shokomisi yomahogololo. Sho hanga sha piyaganeke oshigongi, gavena Nghaamwa okwa hulitha oshipopiwa she nokutula nee miilonga pambelewa elongo ndika lyomahogololo moshikandjohogololo shaHangwena. Shimooshili, pompito yimwe, okwa lombwele aatoolinkundana kutya gavena Nghaamwa ota topola nayi aakalimo yomoshikandjohogololo shaHangwena, ngashi a ti kutya aakalimo moshikandjohogololo shika mboka kaye shi yomongundu yimwe inaya nwa nokulya pamwe. Shimooshili, tati shika otashi ti kutya oshitopolwa shaHangwena natango onkee sha pumbwa omuwiliki ngoka ta tula oshigwana shoka kumwe. Shimooshili tati eindilo lyomupresidende Hifikepunye Pohamba ndyoka a ti kutya oshigwana nashi kale kumwe na inashi ininga nayi uuna tashi ningi iigongi yasho yopapolotika, kali na esiku nali kaya miilonga ngele aawiliki yoSwapo osho taya pi nokuhongakanitha aantu ngeyi. Elongo lyomahogololo moshikandjohogololo shaHangwena moshitopolwa shaHangwena onkee li li metifa noshigwana otashi indilwa shi ye kelongo ndyoka lya simana noonkondo.

Comment on this article

Name:

Email:

Comment:

I confirm that I read the Terms and Conditions and that I accept it.

Source : The Namibian